Qevdê Şiretun

1-  Dunya Dı Ruecya, Vıerena
2-  Duest
3-  Habil
4-  Nasi'het
5-  Mevac Mı Çik Nışınawıt
6-  Pueşmunê
7-  Şirêt Zunayun
8-  'İbret
9-  Çımun Xu Ak
10-Holê
11-Derg Barı Yo Ce’dıd
12-Gulıstun
13-Ena Dunyê Ma Pıorına
14-Şiretêk
15-Rueşun
16-Pers
17-Pê Qala Cal Xu Mekır Tal
18-Hikmêt Enin Encax Tı Zun
19-Heywax Dunya

1-DUNYA DI RUECYA, VIERENA

Dunya dı ruecya, vıerena
Pênid merg est, xu vira mek
Çoyir dunya nıwiyena
Pird Sırat est, xu vira mek

Tı bızun, pênid ‘hesab est
‘Hesab dayişir kitab est
War guınunir ‘hal xırab est
Cıêb kefên çin, xu vira mek

Mallê qê tu sala unên
Dıma yin yên tu kefen kên
Dı merdimiz mezel kenên
Qebra tari xu vira mek

‘Helal-‘herum bızun bıra
Holi qebır kena hira
Tı çarrê merg mek xu vira
Munker nekir xu vira mek

Hê çad pirik kalik şıma?
Pênid şımaz kuên yın dıma
Fati’ha unên yinir ma
Fati’hek wendış xu vira mek

Tu tabutıd bên sêr mezêl
Dorciruniz yên vêr mezêl
Berkuelun şun wird pêr mezêl
Tu kên mezel, xu vira mek

En Feqir vun: Ha sebena
Ax! Ez pênid pueşmun bena
Dunya çoyir duest nıbena
Duêst tu Huma’w, xu vira mek

2- DUEST

Ez yo nesi’het vun tu ra
Dunya pê duêstun bık hira
En vatê mı mek xu vira
Pê duestun başun tı bên hol

Qelb şikya; sê cum ben vıla
Zun xu, çarrê xur mek bela
Xıwera raşt her cad hola
Pê duestun başun tı bên hol

Darbê xıncêr lez bena weş
Darbê duêst, ki kena nıweş
En vatê mı hol bık xu gueş
Pê duestun başun tı bên hol

Dunya pê duşmên bena teng
Zun hem sul’h vırazen hem ceng
‘Heyat xur mek bitum, bireng
Pê duestun başun tı bên hol

Holun ra xuir duestun vıraz
Duestun ra menfe’et mewaz
Kin mewaz ‘hes kerdış bıwaz
Pê duestun başun tı bên hol

Duêst, ‘hella tengıd bêlu bên
Tengunêd, qê tu vazdên yên
Bi tu, yo loğmê nun nıwên
Pê duestun başun tı bên hol

Beğil, çıkuid, tur duêst nibên,
Qê menfe’et lez tu rueşên
Fesadê kên, bin tu kenên
Pê duestun başun tı bên hol

En Feqir tuir unen kitab
Duêst, duêstund nıvinên ‘hesab
Duêst tu Allaw, bi, pê yi şab
Pê duestun başun tı bên hol

3-HABİL

Humê, Adem herr ra vıraşt
Adêm Humê ra ‘Hewwa waşt
Humê muet yin yo ce’do raşt
Mı en vate, kitab ra nuşt.

Adem, peyğember tor vêrin
Mu’hemmed resul ma peyin
Şeytun, min mad duışmen qedim
Mı en vate, kitab ra nuşt.

Habil o Qabil bırêye
Hol vun: Ma neslê Habil’ye
Xırabiz neslê Qabil’ye
Mı en vate, kitab ra nuşt.

Habil'id qoğe kerd qabil
Pıe umyayış waşten, Habil
Qabil xu şaş ke, bı qatil
Mı en vate, kitab ra nuşt.

De’wê Habil zaf gıruna
Hem gıruna hem çetına
Çetınê re’hetê una
Mı en vate, kitab ra nuşt.

Ena de’wê İbrahim’ya
De’wê lac yı İsma’il’ya
De’wê yın ercun nıa vaya
Mı en vate, kitab ra nuşt.

Ce’dê Allê ce’do ze’met
Şeytun, tuı nıverden re’het
Ce’do raşt ra tı şin cennet
Mı en vate, kitab ra nuşt.

De’wê ma de’wê tew’hidya
Sê sim o bırsim o zêrdya
De’wê peyğember E’hmêd'ya
Mı en vate, kitab ra nuşt.

Feqir vun: Ra mek, hişarıb
Qê islumê bırindarıb
Bikesun, biwarur warıb
Mı en vate, kitab ra nuşt.

4-NASİ'HET

Ey ğafil! Bi, ez ha tu ra yo qalêka weş vuna
Qala weş vuna tu ra, qala tal o tırş nıvuna

Hem holıb, hem merdıminıb, havalun bık ziyaret
Dorcirunund hol bıvyarn, xırabê ra kum çı vet?

Ey bıra! Bi, guêş xu ak; tı gueşdariyê qêlb xu bık
Çoy mekış; nefis xu bıkış, hem derecê xu berzık

Ey Haval! Bi, mil xu çotık, ru'h xu bıkır temaşa
Tı nêfs xu terbiye bık, pê çoyid qal mek, 'haşa

Dı rıyê mek, 'hesudê mek, bexilê mek, cumyerdıb
Sexiyê bık, durustê bık, tewazud sê pılasib

Ey merdım! Bi, bun ayne ra, hovêr qusur xu bıvin
En ayned qusur xu bıvin, 'eybun bırun xu mevin

Ey lac mı! Pê bêrid ruınış, astuerê xayin menış
Pêniyê xırabun nina; bi, tim vêr Holud ruınış,

Dı gueş tu êst, yo fêk tu est, hovêr bısenc hama vac
Zaf xebêr med, tay xebêr bıd, çarrê qala zuır mevac

Kênê mı! Tı, her çi ra ver xuiy xu, exlaq xu rındık
Altun, hercad qıymet vinen; xuir exlaq rınd zinetık

Gellê insunun! Bıerên, ma insunatê ca nıverd
Mal dunya tim dunyad munen, kum çi cıêb kefên xud berd?

Bıerên, ma dunya xu paşt nık; pê holê rar xu raştık.
Kin, nefret ra fayde çinyu, ma verg o vare aştik

En Feqir ho zêrr ra vun, çoy ra nıvun ho xu ra vun
Xu bızun, rar xu bızun, wezunê mek, Rabb xu bızun

5-MEVAC MI ÇİK NIŞINAWIT

Mevac mı çik nışınawut,
Humê Peyğember şırawut
Peyğembêr rar Allê pawut,
En din, mar sê neqiş vawut

Mu'hemmêd ce'dê ma kerd raşt,
Feqirur mazlumur bı paşt
Mar sırat musteqim vıraşt,
Zalımunriz cehennem waşt

Qur'un Kerim ma kên xu dest,
Pê me'nê en Qur'un bên mest
Qur'un vun: Kafİr nıbên duest
Paştê xu pê kafir mebest

Bi, ayet ayet Qur'un bun
Allah İlac derdun ma zun
Ayetud ho tur misal un
Herg çi ra pil Huma'w pil est

Qur'und tim qıssê delal êst,
Hem ayêt 'herum-'helal êst
Peyğemberun ra misal êst,
Çeşit çeşit qal zelal êst

Qur'un mar qalê Harun ken,
Hem dımaz mar be'hs Qarun ken
Per binraz xıssê Fir'un ken,
Qur'un'd ina qıssê wêş êst

Qur'un vun: Mar axiret est,
Holur qat Allêd cennet est
'Hesab Humê'd 'edalet est,
Elbet xırabur 'ezab est,

Qur'un vun: Exlaq xu holık,
Bi, vatê Loqmun 'Hekim bık
Tıvêr xuz, zerrê xuiz pakık,
Qur'un'ıd ayêt exlaq êst

Qur'un vun: Allê ra bıters,
Bıe Allê xu çoy ra meters
Kin mebest, xu vira bık yers,
Min Qur'unıd weş şirêt êst

En Feqir vun: Çare, Qur'un
Qur'un tu ra vun: Bi, mı bun
Huma ilaç derdun ma zun
En şi'ırdiz tuir şirêt êst

6-PUEŞMNÊ

‘Emır qıedya, ez ha şına
Deqag viyerta hin nina
Ayag şına nina hina

Hem pueşmun, hem pêrişuna
Wallahi ez zaf pueşmuna

Ez yo xuertêko naşibya
Çê en rarun ra nışibya
Hem ez xu ra zaf weşibya

Hem pueşmun, hem pêrişuna
Wallahi ez zaf pueşmuna

Ena sêni yo dunyaya?
Ez hun ra newe bıa aya
Ayag viyerta, şıa; vaya

Hem pueşmun, hem pêrişuna
Wallahi ez zaf pueşmuna

Çim mı bi kuar, zun mı bı lal
Mı xur kerd lıêl dunya zelal
Dêst mı vêngyê, ya Zelcelal
Hem pueşmun, hem pêrişuna
Wallahi ez zaf pueşmuna

Ez min dêrd-kedêrid pêşa
Kılê adir ‘eşqid vêşa
Hin ez biçare, nıweşa

Hem pueşmun, hem pêrişuna
Wallahi ez zaf pueşmuna

Ez ni şeytun ni meleka
Sêr awıd sê yo keleka
Bin felekıd yo pıeleka

Hem pueşmun, hem pêrişuna
Wallahi ez zaf pueşmuna

Nefıs, mir bı sê cınawir
Cunê, xuertê şi, bi sê zuır
Ruêc êr, nı ume mı vir

Hem pueşmun, hem pêrişuna
Wallahi ez zaf pueşmuna

Mı va êr, sıba, bıor, bintor
Sanki ‘emır nı qedyen tor
Gıjık sıa bı sıpi sê vor

Hem pueşmun, hem pêrişuna
Wallahi ez zaf pueşmuna

Vizyêr, perêyo pıerarê
Pueşmunêr çoy nıdyu çare
Êr mir menda yo biwarê

Hem pueşmun, hem pêrişuna
Wallahi ez zaf pueşmuna

Ya Rabbi! Mı dêst kêrd a tur
Mer’hemet bık en Feqir’ir
Ra’hmê tu zafa herkêsir
Hem pueşmun, hem pêrişuna
Wallahi ez zaf pueşmuna

7-ŞİRÊT ZUNAYUN

Ey haval! Bi, vêr mıd runış
Gueştariyê mı bık emış
Astuerê xayin ser menış
Eniz Şirêt zunayuno

Xıwerê xu bısenc o vac
‘Herum ra mevıraz ilac
Exlaq hol ra xuir vıraz tac
Eniz Şirêt zunayuno
 

Fesadê ‘hesuid ra bıters
‘Hesud, tu ra zaf lez ben yers
Yı şeytun ra gureta ders
Eniz Şirêt zunayuno
 

Çarrê pê çoyid qal mekır
Tu dest ra bier, holê bıkır
Wa fêk tu nımus zem o zur
Eniz Şirêt zunayuno
 

Dadi-babi xu vira mek
Tı sılê re’hmiz cı ra mek
Hem qêlb cirunuz xu ra mek
Eniz Şirêt zunayuno
 

Kum, qê Humê bunc yo cefa
Wı Cennetı’d vinen sefa
Tı duestun xuir meb bi wefa
Eniz Şirêt zunayuno
 

Zerrê xu tim bıkır hira
Tı zerrê çoy meverd xu ra
Ruecêk ma pıor şin dunya ra
Eniz Şirêt zunayuno
 

Emunêtir mek xıyanet
Nıweşuniz bık ziyaret
Hem xu vira mek ‘edalet
Eniz Şirêt zunayuno
 

Pê tebessum sılum biger
Faiz, ruşwet çarrê meger
Me unc qê dunya ğem-keder
Eniz Şirêt zunayuno
 

İlim, ‘hikmet xur rehberık
Tim ‘alimund havalti bık
Tewazud, xu sê pılasik
Eniz Şirêt zunayuno
 

Bi hovêr ‘eybun xu bıvin
Qusur şar mevin, bin ‘erd fin
Tim tu vinen Huma’w cuarin
Eniz Şirêt zunayuno
 

Dadi ra tim biger du’a
Babi ra meger beddu’a
Ne’heqidiz mek iddi’a
Eniz Şirêt zunayuno
 

Tim ‘alimud wırz o runış
Pıorê qıcun xu bıd wendış
Wa qêlb tud tim bıb ‘heskerdış
Eniz Şirêt zunayuno
 

Extyarun ra ‘hikmet bıger
Cunun ra cesaret biger
Herçi ra yo ‘ibret biger
Eniz Şirêt zunayuno
 

En Feqir vun: Bun ‘ayne ra
‘Eyıbun şar mek ‘eşkera
Çarrê Humê mek xu vira
Eniz Şirêt zunayuno

8-'İBRET

Bıgêr dunya ra; bıger ders
Mevac ez zuna; hina pêrs
Pê perso pers tı rasên Qers
Persayışıd mar ‘ilim est

Vızyer ez umeya dunya
Mı va qê ena yo kaya
Ez bıa hişar, ez bıa aya
İtyad mar yo imti’hun est

Ez holun hetıd runışta
Xırawud runışt-wırışta
İxanêt duestun ez kışta
Enidiz mar tercrube est

Mı şêwiz di, mı ruêciz di
Tengunayiz, hirayêz di
Êriz mı ra merg bıu nizdi
Pênid mar en ‘aqibet est

Mazlum vizyêr, êr bı zalım
Zalım ma ser erzon çalım
Eg tı vındir ‘eql-i selim
Enidiz mar yo ibret est

Mı ‘aşıq di ‘eşqıd pêşêb
Min yo adir ‘eşqid vêşêb
Tay m’eşuqiz, qê ‘eşq kışyêb
Min en ‘eşqid, yo miraz est

Mı karwun di rarıd mêndib
Tay asparib, tayiz pêyib
‘Ecayib rayun min yındib
Rar karwunund zaf rayun est

Mı zenginiz, feqiriz di
Pê mal-mulk çoy nıdi mırdi
Nina herkês ra cumyêrdi
Cumyerdunıd cesaret est

Mı zengin di, vêşun mendib
Pê zenginê mırdê nıdib
Feqirê zerrê qêlb yındib
Min zenginund zaf sefil êst

Tay, hê be'hrunıd asnaw kên
Tay, yo çêng awıd xenıqyên
Tayiz hê ters ver cenıqyên
Tengunayêd imti’hun est

Ni emnun mend, ni zımıstun
Ni bılbıl mend ni gulistun
Bı xırabe en şaristun
Şaristunıd yo ‘huzın est

Feqir ho vun: Xu şaş mekır
Hemiz vun: Gueşun xu akır
Tim vatê pilun xu bıkır
Pilun ra pil yo Huma est

9-ÇIMUN XU AK

Çımun xu ak, dunyad bıgêr
Her çi ra yo ibret bıger
Yo karêk bık, betal megêr
Her çi ra yo ibret bıger

Herkêsid yo fek dı guêş êst
Hem qal xırab, hem qal wêş êst
Min umbazund tay qallêş êst
Her çi ra yo ibret bıger

Xırab, pê zun ceng vırazên
Holiz, pê zun holê wazên
Zuırkêr musê zurun erzên
Her çi ra yo ibret bıger

Ma pıor pê dı çımun unyên
Qısmêk unyên, qısmêk vinên
Tayiz unyên o nıvinên
Her çi ra yo ibret bıger

Herkêsit êst dı ling, dı dêst
Vêrniyê mad dı ce’dê êst
Havalun holun bıkır duêst
Her çi ra yo ibret bıger

Feqir vun: Çımun xu akır
Hem bık fıkır, hemiz şıkır
Biçare meb, sabır bıkır
Her çi ra yo ibret bıger

10-HOLÊ

Bi, ma holê xur yo rarık
Bırati qê rar xu pırdık
Kin o nefret xu ra durik
'Heskerdışıd holê esta

Bıerên, ma qê holê gum berz
Derecê xu zaf bıkır berz
Xu ra duir fin kin o ğerez
Elbet holêd holê esta

Qê şirinê vazdên, bıerên
Kuayış-kıştış ra duir şıerên
Çarrê holê ra me vıerên
Holê dıma holê esta

Adır adir huna nıken
Fesadêk yen, adır pıf ken
Pê pıf kerdış adır weken
Fesadêd xırabê esta

Xırabê ra holê nina
Tı adır pê aw bık huna
Holê sê aw ma pak şuena
Şıtışıd mar holê esta

Feqir Şuma ra ken rica
Semêd holê bıerên yoca
Wa mar guılistunıb her ca
En vatediz holê esta

11-DERG BARI YO CE’DID

Ez ha derg barı yo ce’dıd
Nıvınden ez şın şew o ruec
Ez nızun ha çıs yo ‘halıd
Şına, şına ez şew o ruec

Ez o wextıg bıa day xuı ra
Ez nıvınerta; mı da ra
Zerrê quınaxa dı ber ra
Şına, şına ez şew o ruec

Puncas şeş sêr en ce’dunıd
Kuêyun, dêştunıd, çuelunıd
Ez ha welat ğeribunıd
Şına, şına ez şew o ruec

En Feqir şaş bıu en ‘halir
Gıe bermen, gıe wıyen ‘hal xuir
Qê rasayiş menzili yir
Şına, şına ez şew o ruec

12-GULISTUN

Gellê bırun bıerên yoca
Ez şuma ra kena rica
Ma xuir sê cennêtik her ca
Wa welat ma gulıstunıb

Bıerên, ma yo bezre bırum
Şew o ruec ma xuir bık 'herum
En bezre mar bıb sê yo gum
Wa dunya mar guılıstunıb

Mevac: Pê yo vıl wısar nin
Kumıg payiz bezre ‘erd fin
Bezre zil dun rengin rengin
Wa wısar mar guılıstunıb

Bıêrên ma êr ‘eşq ra bıberm
Qêlb xu pê en 'hesrun bık nerm
Zêrr ra bıberm rı ra meberm
Wa zerrê ma gulıstunıb

Bıerên, ma yo holê vıraz
Duşmênunriz holê bıwaz
Verg o vare wa bib umbaz
Wa waten mar guılistunıb

Bıerên, ma yo qala weş vac
Wa ena qal mar bıb ilac
Qelb meşkın, ne‘heqi mevac
Wa her ca mar gulıstunıb

Bıerên, ma tafin yo çıla
Şoq yê ra wa ğem bıb vıla
Xırabê mek; holê hola
Wa dorvêr ma gulistunıb

Feqir vun: Tim holê bınuıs
Pê en nuıştiş holê ra duıs
‘Heqikêt bıayiş xu bımuıs
Wa zindun mar gulıstunıb

13-ENA DUNYÊ MA PIORINA

Gelê umbaz erciyayê!
Haval delal o vicnayê!
Bawo, dayê, bıra, wayê
Ma bizaryê; marazdaryê

Ena dunyê ma pıorına
Dunya pê holê şirına

Humê'r şıkır, ma hişaryê,
Zalımunir isyunkaryê,
Ne'heqêriz sitemkaryê,
Lıngwarwur, biwarur waryê

Ena dunyê ma pıorına
Dunya pê holê şirına

Ma vun: 'Heq, 'huquq, 'edalet,
Hem fazilet hem se'adet
Ma nıvun: Zuılım, rezalet
Holê, dunyad hola elbet

Ena dunyê ma pıorına
Dunya pê holê şirına

Ma nıwazên, dunyad şiddet
Ma wazên dunyad selamet
Bikesun ra ma gên quwwet
En quwwet mar ben cesaret

Ena dunyê ma pıorına
Dunya pê holê şirına

Zalim dunya ra bi vıla
Sê tertuir ma ser bi bela
De'wê ma lıêl nıa; zelala
Hem zelala, hem delala

Ena dunyê ma pıorına
Dunya pê holê şirına

Tij, ma pıorın kena germın
Ma pıor pê aşm, vinên herın
Pê aw dunya bena zerguın
Şuma qê rışnên ena guin?

Ena dunyê ma pıorına
Dunya pê holê şirına

En 'erd ma yow, 'ezmun ma yo
Varun sêr ma pıorınd varo
Sila’hun ciğêr ma vêşno
Pê ‘herb, sêr ma ra merg varno

Ena dunyê ma pıorına
Dunya pê holê şirına

Tı hê yı, wı ho tuı kışen
Qoğe, 'herb cigêr ma vêşnen
Emperyalist sıle'h rueşen
Sê duızrıg, guin ma ra dueşen

Ena dunyê ma pıorına
Dunya pê holê şirına

Ez, êr ne'heqêr yo venga
Mazlumur dunya birenga
Hem birenga, hemiz tenga
Mir, de'wê mazlumun cenga

Ena dunyê ma pıorına
Dunya pê holê şirına

Mevac: O kum, en biniz kum
Ez, ha şuma pıorın ra vun
Zulım, kumca ra bıer zulım
Mazlum, pıorê dunyad mazluım

Ena dunyê ma pıorına
Dunya pê holê şirına

Dengız sıpid ez xenıqya
Pê mêrg mı, ço nıcenıqya
Ena 'heq nıa, ne'heqêya
Dunyad insunê terıkya

Ena dunyê ma pıorına
Dunya pê holê şirına

Kobani’riz ez bermaya
Afrin’ıd ez biçareya
Şum’ıd, pê bomba bıa aya
Hem vêşun, hem lıngwarwêya
Ena dunyê ma pıorına
Dunya pê holi şirına

Filistin'ir ez ha bermen
Roboski'riz ez ha vêşen
Ez semêd mazlumun nalen
Qêren; perdê zulim dırnen

Ena dunyê ma pıorına
Dunya pê holê şirına

Ez cıabıayış qet nıwazen
Bomba nı erzen; gul erzen
Pê bıratê sulh vırazen
Dunyad pıe umyayış vazen

Ena dunyê ma pıorına
Dunya pê holê şirına

En Feqir Zazaki nuısen
‘Herf o ‘herf zazaki musnen
Her wext pêr mazlumund vınden
Ho semêd mazlumun nalen

Ena dunyê ma pıorına
Dunya pê holê şirına

14-ŞİRETÊK

Wısar ume, dar ben gunê
Teyr o tur vinên zerguınê
Ma vêndên yı, wêxt tengunê
Alley zıkır kên, vun: ’Hay!.. ‘Hay!

Tı, qadiryê, ma ‘acizyê
Tı, zenginyê, ma feqiryê
Tı, war en ‘erd o ‘ezmunyê
Tı, Rabb alemunê… Hay!.. Hay!

Kum emir tur isyun bıkır
Vatê peyğemberun nıkır
Deftêr xu pê gunun dekır
Cehennemıd vunu: Way!.. Way!

Kumıg holê dıma nışyer
Qırıkê yı ra ‘herum şıer
Şeytun dıma şıer, ‘herum buer
Ben pueşmun; pênid vun: Ay!.. Ay!

Dunya xuna; dı berina
Şewêk ez ityad vındena
Vızyêr umêya, êr şına
Ez şuma ra vuna: Bay!.. Bay!

Ya Rabb! ma ğeflet ra ayak,
Ma hişarık; çımun ma ak
Teng mekır, exlaq ma hirak
Rar xu ra şaş mekır, ray-ray.

Ruece bıger, bıkır nımac
Megêr bi ğusıl, bi destmac
'Heq vacır; ne’heqê mevac
Şeytun tu ra ramen, cay-cay.

Kar ğafilun laf u guzaf
Hê şin şeytun dıma saf-saf
Tim Allêr ‘isyun kên zaf-zaf
‘Emel sali’h kêni, tay-tay

Bıra rar raşt ra şu tim tim
Rar Humê sırat musteqim
Tu ra vun: Loqmun u ‘Hekim
Axretıd meb rezil-rusway

Dayê, bawo, wayê, bıra!
Hin hişarıb, ayab hun ra
Hem pueşmunıb guınun xu ra
Tewbe bıkır sare ra pay

Feqir vun: Destun xu akır
Ax u wax u zari bıkır
Hem fıkır bık, hemiz zıkır
Tim bıger rızê pi o may

15-RUEŞUN

Êr ‘arefo, sıba rueşun
Ma rueşun kên, hem ruec hem şun
Rueşunıd persên nıweşun
Rueşun şuma mubarekıb.

Rueşunıd yersbyayê bên aşt
Qic hê keyf kên, çim yin bên raşt
Ben sinaye kum holê waşt
Rueşun şuma mubarekıb.

Dadi babi bık ziyaret
Sılê re’hmiz bıkır elbet
Xırabê ra kum holê vet?
Rueşun şuma mubarekıb.

Merdun xu, xu vira mekır
Tırbun yın ziyaret bıkır
Ni’metun Humê bık şıkır
Rueşun şuma mubarekıb.

Rueşunıd şirinê vıraz
Qêlb xu ra berz kin o maraz
Holê bık xırabê mewaz
Rueşun şuma mubarekıb.

Feqir ho zazaki nusen
Her kelima yoy ra musen
Rueşun şuma pıorın persen
Rueşun şuma mubarekıb.

16-PERS

Eg naxırıd yow bız gerr vet,
Tuiz uca ra aya nıvet;
Pênid eşnawena millet,
Naxır bıb gerrın aqibet;
Qeba’het naxırun çıno?

Eg toxtor nıwêş weş nıkır
Şifa caverd, tuma bıkır
Çımvêşunıb, cıêb tu akır
İnsaf nıkır; cıêb xu dekır
Qeba’hat toxtorê çıno?

Eg yo ‘alim bi edebıb
Hem bire’hmıb, hem ğezebıb
İlim caverd o zeğelıb
Min talebund mubtezelıb
Qeba’het âlimê çıno?

Eg westa tu bıkır maraz
Bun tu weşun, rınd nıvıraz
Tuir quex vıraz, xuir kueşk bıwaz
Dızdê ra sermaye vıraz
Qeba’het westayê çıno?

Eg ‘hakim rar ‘heq ra vecyê;
‘Heq- ne’heqê hol nısêncyê,
Dunya sêr sarê mad rıcyê,
Qanun hêt menfe’et uncyê;
Qeba’het ‘edalêt çıno?

Eg zengin wên, guazli cenên
Nun feqir fêk yin ra vecên
Sê qedim hêt xu ra uncên
Semêd mal dunyê ma rıcnên
Qeba’het zenginê çıno?

Eg malla ce’dê xu şaşık
Sê qedim hêt tu ra kaşık
Tuir vayık o xuir belaşık
Tuir ‘herumık o xuir başık
Qeba’het mallayê çıno?

Toxtor, ‘hakim, ina mekên!
Eg buê kot guêşt, ma guêşt sual kên
Sual bueyınıb, la ma sekên?
Mallê welat, gueş xu akên!
Mevacê: Xetê ma çıno?

Feqir tuir ho vun yo qısse
En qısse ra biger ‘hisse
Gueş mı serın, ez ha vun se
Eg xenıqya awıd mase
Qaba’hat dengızun çıno?

17-PÊ QALA CAL XU MEKIR TAL

Guêş xu hol ak, vatê mı dek
Bext ho wextıd, text ho bextıd
Pê zeğelê êr-sıba mek
Bext ho wextıd, text ho bextıd

Çıtag viyert dıma mekuır
Pê me’rifet mêzg xu dekır
Gurê xu tim wextıd bıkır
Bext ho wextıd, text ho bextıd

Me agêr, tim bun xuwa ver
İna bıkıg tı şıêr wever
Kar-gurê wêxt tuir ben pêwer
Bext ho wextıd, text ho bextıd

Ihınd bıkır tı pueşmun nib
Min şarid tı ağab, begib
Hem war vatê, hem şerêfib
Bext ho wextıd, text ho bextıd

Kar-guırê êr, sıba meverd
Caverd, awa ‘herum deverd
Qalê pilun munena zerd
Bext ho wextıd, text ho bextıd

Feqir tuir vun, qala zelal
Kum ‘heq nıvac, ben şeytun lal
Pê qala cal xu mekır tal,
Bext ho wextıd, text ho bextıd

18-HİKMÊT ENİN ENCAX TI ZUN

Tı ‘erd wışk ra vaş nerm vecên
Hikmêt enin encax tı zun
Tı hem dun ma, hem pêser gên
Hikmêt enin encax tı zun

Ya Rabb! Ez tu ra nıpersen
Ez pêniyê xu ra tersen
Çınag bıvin ayi nusen
Hikmêt enin encax tı zun

Tı çım dun ma, feraset gên
Qelafet dun me’rifet gên
Extyarid ma ra quwwet gên
‘Hikmêt enin encax tı zun

Tı hem guıl dun, hem telı dun
Tı hem ‘eşq dun, hem çelı dun
Tı hem dendık, hem çulı dun
Hikmêt enin encax tı zun

Emnun kên germ, zımıstun serd
Wısar zerguın, payiz kên zerd
Pê aw, tı kên guni en ‘erd
Hikmêt enin encax tı zun

Tı hem ax dun hemiz wax dun
Tı hem wıcax, hem qundax dun
Eg merg ume, ma heywax vun
Hikmêt enin encax tı zun

Tı tari dun, rueşnayê gên
Tı tij vecên o aşm nımnên
Yo per ra dun, per bin ra bên
Hikmêt enin encax tı zun

Ayag tu ra yena ma ser
Ma vun: Sarê çımun ma ser
Feqir en vatê nê pıeser
Hikmêt enin elbet tı zun

19-HEYWAX DUNYA

‘Heskerdış dunya ra vılak
Kin-nefret qêlb xu ra cırak
Pê xolê zerre xu hirak

Huma’w pil guırun xu hol zun
Ma çına waşt, wı ayi dun

Vêrgir meşna, meşnar verg meb
Mêrgir guni gunir merg meb
Sê varun wısarib, tuerg meb

Humaw pil guırun xu hol zun
Ma çına waşt, wı ayi dun

Bexil, çıkud çım vêşunu
Kıştê Awê Ruêd teşunu
Bırê wêr tim, perişunu

Humaw pil guırun xu hol zun
Ma çına waşt, wı ayi dun

Zerr hirab, dunya xur teng mek
Dengdulab mek, zaf weleng mek
Bi, xud aştıb, çoyid ceng mek

Humaw pil guırun xu hol zun
Ma çına waşt, wı ayi dun

Qena’et yo zenginêya
Zerrweşêya, renginêya
Bexilê tim tengunêya

Humaw pil guırun xu hol zun
Ma çına waşt, wı ayi dun

Hayhuy dunya dıma mekur
Gueştşt, wı ayi dun

Ni ay bıwaz, ni way bıwaz
Ni zaf bıwaz, ni tay bıwaz
Ni zaf ercun, ni vay bıwaz

Humaw pil guırun xu hol zun
Ma çına waşt, wı ayi dun

Feqir vun: Heywax tuir dunya!
Ma çı diya, çı nıdiya
Tı çarrê çoyid nıwiya

Humaw pil guırun xu hol zun

Ma çına waşt, wı ayi dunariyê qelb xu bıkır
Vılun aryek, egmin dekır

Humaw pil guırun xu hol zun
Ma çına wa