'Hiciwi

1 Wış Tı Lemın Babo!
2 'Hal Ma
3 Şumad Qanun Zalımun Est
4 Qutwêr Ma, Hakkêr Şar
5 Politiqa
6 ‘Emeriqa
7 ‘Heyat Bı Pert
8 Muduır
9 Ez Vun Kavır Tı Vun Kafır

1-WIŞ TI LEMIN BABO!

Derdu aqil sarê mı berd
Wış tı lemın babo!
Suic mı çıto la mı sekerd?

Tuı mıd ‘huzur nıverdo; bo
Wış tı lemın babo!

Tu ez kerda war zaf derdun
Ax! Mı werrê xu ard merdun
De bi, mevac lacy cumıerdu

Tu mıd ‘huzur nıverdo; bo
Wış tı lemın babo!

Enag tu veta mı sare
Tu ez kerda yo 'eware
Dunyad çê est enir çare?

Tu mıd ‘huzur nıverdo; bo
Wış tı lemın babo!

Ez qedya, dermun mıd nımend
Tu pê zulım mezêl mı kend
Ni keyf, ni zi huzur mıd mend

Tu mıd ‘huzur nıverdo; bo
Wış tı lemın babo!

Dunya mir bıa yo bar gırun
Tim ling uncên ze’hmêt sarun
‘Heyat mir bıu sê yo zindun

Tu mıd ‘huzur nıverdo; bo
Wış tı lemın babo!

Yo qehr şın, yona derd vecyen
Keder ra bedên mı rıcyen
Derdun ver sarê mı decen

Tu mıd ‘huzur nıverdo; bo
Wış tı lemın babo!

Ez bıa extyar sê yo pirêk
Ena dunya mir bıa sê wek
Zulim tu ver ez nızuna sêk

Tu mıd ‘huzur nıverdo; bo
Wış tı lemın babo!

En Feqir derdun ver nalen
Derdun tu ver sarê xu kuen
Dunyad ‘huzurêk nıvinen

Tu mıd ‘huzur nıverdo; bo
Wış tı lemın babo!

2-'HAL MA

Ez ha derdun xu nalena
Ya Rabbi tı ma hişarik.
Hem nalena hem hemiz vuna
Ya Rabbi tı ma hişarik.

Ma tor nızun ma hê sekên
Kelbê gurêt yobinun kuên
Ağêz hê ma ser ‘hukım kên
Ya Rabbi tı ma hişarik.

Tirk, kird ra vun: En yo duışmen
Kırd, Tirk buer; yı ra mırd nıben
Per bin raz ‘ereb ho ‘herb ken
Ya Rabbi tı ma hişarik.

Bırê, hê bırun xu kışên
Pê en, hê cigêr ma vêşnên
Kafir, sile’hun xu rueşên
Ya Rabbi tı ma hişarik.

Fesad, binatê mad gêrên
Nıvındên, hê fesadê kên
Maz, şin yın ra aqıl gên, yên
Ya Rabbi! Tı ma hişarik.

Wextêk ma bi sağci-solci
Dıma ma bi tırkçi- kırdçi
Ay binraz ma vun gerici
Ya Rabbi tı ma hişarik.

Mazlum dunyad zaf bi biwar
Zalim, bi sê cınawir har
Bi cınawir, kot min dıwar
Ya Rabbi! Tı ma hişarik.

Yemenic hê ‘herbıd mırên
Qıj yın, hê bin bombud bermên
Qıral Su’ud bi har zırrên
Ya Rabbi tı ma hişarik.

Afğanistund, ma kuayış wên
Miyammarıd, ma hê kışıên
Filistinıd ‘err ra kaş bên
Ya Rabbi tı ma hişarik.

Qısmêk, mırên vêşunê ver
Qısmêk, hê mal-mulk nun pıeser
Qısmêkiz, xur ‘herum kên wer
Ya Rabbi tı ma hişarik.

Tay, hê vêşunê ver mırên
Ay bin mırdyê; hê spor kên
Tayiz, zaf wên o rejim kên
Ya Rabbi tı ma hişarik.

İnsaf nımend, wijdun nımend
İnsaf, wijdun bin ‘erdund mend
Zalımuniz mezêl ma kend
Ya Rabbi tı ma hişarik.

Ma hê sarê yobinun wên
Kafir hê duir ra sıêr ma kên
Sile’h dun ma; perun ma bên
Ya Rabbi tı ma hişarik.

Ma yobinur hol bi cihat
Sê dikun pirç yobinun pat
Qêy bıu ina ‘hal en welat?
Ya Rabbi tı ma hişarik.

Yın hê sıer kên; ma qoğe kên
Yın sile’h dun, ma hê kışên
Sê vergun, guêşt yobinun wên
Ya Rabbi tı ma hişarik.

Yobinun ra 'hes nıkên ma
Ma nışin yobinun dıma
Tı aqıl bıd ma ya Huma
Ya Rabbi tı ma hişarik.

Bi, ma yobinun hişarık
Mazlumun bin yo bayrağık
En zımıstun, xur vısarık
Ya Rabbi! Tı ma hişarik.

Ya Rabb! Mazlumur yardım bık
Zalımun bin ‘erd ra warık
Dunya yinir tarik, tengık
Ya Rabbi tı ma hişarik.

En Feqir ho kitab ra vun
Çoyir nıvun ho xu ra vun
‘Hal ma ho Alley ra ‘eyun
Ya Rabbi tı ma hişarik.

3-ŞUMAD QANUN ZALIMUN EST

Şeri'et mad 'edalet est
Hem şefqet o mer'hemet est
Mad qanun Qur'un Kerim est
Şumad qanun zalımun est

Mad Musa, şumad Fir'un est
Şumad Deccal mad Mehdi est
Qê Nemrudun İbrahim est
Zalımunir cehennem est

Dunyad ma de'wê Habil kên
Şuma hê qoğê Qabil kên
Ma hê yo de'wêka pil kên
Şuma hê dunya rezil kên

Bi zulim şumad çıta est

Şumad qatil Stalin est
Mad sê altun yo tarix est
Sela'haddin Eyyubi est

Ma vun ma neslê Adêm’yê
Êr ri 'erdud ma mazlumyê

Herkes hol zun şuma kumyê
Şubhe çin şuma zalımye

Ma 'edalêt 'Umêr wazên
Şuma hê mal feqirun wên
Ma hê du'ê mazlumun gên
Mazlum şumar le'net unên

Şuma tıfıngun xu gên yên
Ma paştê xu Allê ra gên
Ma têna Allê ra tersên
Şuma vırıstê ra tersên

Ma ümmetê Mu'hemmêd’yê
Şuma duêst Ebu Cehil’yê
Ma vun: ma ehl-i tew'hidye
Şuma ehl-i dalalêtye

'Hemad şuma qatli'am kerd
Şar 'Helepçe’z şuma qır kerd
Hiroşima’d atom eşt 'erd
Rid şuma ra ço nımend merd

Ez kumê vaj, kumê nıvaj
Zulım şuma herkêsir vaj
Hem qetli'am Cezayir vaj
Bosna-Hersek o Libya’z vaj

Ma Humê ra medet wazên
Zalımur hezimet wazên
Dunyad yo 'edaled wazên
Din Allêy riz nusret wazên

En Feqir ho şuma ra vun

Huma pê qur'un nusret dun
Kumıg qur'un bun enin zun
Qur'un dunyar 'edalet un


4-QUTWÊR MA, HAKKÊR ŞAR

Tı sê meymun muqellidye
Qutwêr mayê, hakkêr şaryê
Tı warun xur sê kutikyê
Qutwêr mayê, hakkêr şaryê

Kuêk ‘esıl xu ra şermayên
Pê dadi-babi xu wıyên
Awrupa ra aqıl gên yên
Qutwêr mayê, hakkêr şaryê

Fêk xu kên a, çımu cun ra
Miyes şına tu qırık ra
‘Elyejg ha yena tu fek ra
Qutwêr mayê, hakkêr şaryê

Yo qırawat, o yo çaket
Tı enir vun medeniyet
Aqıl tu ındêko elbet
Qutwêr mayê, hakkêr şaryê

Yın zurvıraz, tı zurkêryê
Tı fındkêr ni, zaf ehmaqyê
Tu xu kerd qıj o ferıkyê
Qutwêr mayê, hakkêr şaryê

Yın ma ra ‘edalet guret
Tı, yın ra musê rezalet
Tud, ni aqıl est, ni hikmet
Qutwêr mayê, hakkêr şaryê

Tı karker ni, yo kaykêryê
Hem wezunyê, sê yo hêryê
Xebatoğ ni, bırê wêryê
Qutwêr mayê, hakkêr şaryê

Yın teknoloji icad kên
Tı şin kuçun yın umarên
Ma ra tırawên, ucad wên
Quıtwêr mayê, hakkêr şaryê

Yın şin ‘ezmunun ra gêrên
Tı şin meyxunund reqi wên
Bên serxueş yên, sê hêr zırrên
Quıtwêr mayê, hakkêr şaryê

Tı xayin; memleket vêşnên
Vêr warun xud bueç teşunên
Şin sulun yın raşunên
Qutwêr mayê, hakkêr şaryê

Bar kitab, hêr nıken 'alim
Ma vun ‘ilim, tı vun filim
Yınir bên hol, mar bên zalim
Qutwêr mayê, hakkêr şaryê

Tı Qarl Marx ra vun: Qıral Marq
Pê diploma tı bi ehmaq!
Hem sê sefil lêsên fıraq
Qutwêr mayê, hakkêr şaryê

Tı mar ni, hê yinir vêşên
Vêr suqbêr Awrupa'd ruşên
Dımaz yên, mar aqıl rueşên
Qutwêr mayê, hakkêr şaryê

Tı mar cumyêrd, yinir terês
Tı mar qertal, yinir miyês
Tı bikesyê, hemiz nekês
Quıtwêr mayê, hakkêr şaryê

En Feqir vun: Hol bun xu ra
Teng mek zerrê xu, bık hira
Mevac: Ena qaliz zura
Quıtwêr mayê, hakkêr şaryê

5-POLİTİQA

Seçim ra seçim şuma yên
Kuên ma dıma reyun ma gên
Pê zurun aqil sarê ma bên
Rabbi mı şuma isle’h bık

Heywax! Qê şuma ina kên?
La ma nızun, şuma sekên?
Ma guınaw, lia ina mekên!
Rabbi mı şuma isle’h bık

Ma zaf hol zun şuma seko
Pê zurun memleket deko
Sare ra pay talun ko bo
Rabbi mı şuma isle’h bıkw

Pênid merg yen mek xu vira
Axretiz est, dunya zura
Ez tim wazen Allê xu ra
Rabbi mı şuma isle’h bık

Memlekêt ma ıhnd biwar nıu
Şar ma insun, sê dıwar nıu
En rar şuma hol yo rar nıu
Rabbi mı şuma isle’h bık

Pê mequmu ço nıbên gırd
Çim vêşun pê wer nıben mırd
Şuma xuir menfe’et kerd wırd
Rabbi mı şuma isle’h bıkw

En qalun ez ha şumar vun
Ez du’un ken, zotun nıdun
Qê Allêy vun, enê bızun
Rabbi mı şuma isle’h bık

Çim şuma pê wer mırd nıbên
Şuma hem wên, hem dızdê kên
Pizê xu gên hêt ma ra yên
Rabbi mı şuma isle’h bık

Lia, qêy wel bıa sarê şumar
Le’nêt Humê şumar bıvar
Şuma, ma vinên, sê dıwar
Rabbi mı şuma isle’h bık

Şuma memlekêtir sekerd
Cıêb ma ra vet, cıêb xu dekerd
Huma enê şumar nıverd
Rabbi mı şuma isle’h bık

Şuma vergi ser vergi gên
Ma nızun en perê sebên
Şuma dest ra bıer, gun maz gên
Rabbi mı şuma isle’h bık

Şuma bina şa vêr bina
Ma guni kot mezel ina
Qê şuma ra holê nina?
Rabbi mı şuma isle’h bık

Şuma çik nıverda qêdna
Cıêb xu pê ‘herum şedina
Zerrê cigêr maz ‘helina
Rabbi mı şuma isle’h bık

Şıêrên vinên memlekêt şar
Wa ‘ibretıb ena şumar
Qê, feqirê bıa qeder mar?
Rabbi mı şuma isle’h bık

En mequm çoyir nımunên
Salê şumaz mallê unên
Şuma çıta kefenıd bên?
Rabbi mı şuma isle’h bık

Ma hê vêng ‘edalet wazen
Êdelet ra medet wazen
Şuma ra yo xizmet wazen
Rabbi mı şuma isle’h bık

Feqir şuma ho iqaz kon
Kin nıbeston xu viraz kon
Ho ne’heqêr itiraz ken
Rabbi mı şuma isle’h bık

6-‘EMERİQA

Ma hol zun, tı ha sekena
Emperyalist ‘Emeriqa
Ha pê zulım hukım kena
Emperyalist ‘Emeriqa

Tu çik nıverdo bo ma ra
Sê duzrıg dusya duınya ra
Guin sıpena mazlumun ra
Emperyalist ‘Emeriqa

Tı bıa Fir’un, ma bi musa
Şeytunê şeytun ra muısa
Zulim tu her ca ra hêsa
Emperyalist ‘Emeriqa

Tı tim vuna: Demoqrasi
Pê zulım tu xu kerd asi
Ma tı hol kerda şınasi
Emperyalist ‘Emeriqa

‘Emeriqa bıa ağê ma
Ya fit kena barığê ma
Ha sıer kena en qoğê ma
Emperyalist ‘Emeriqa

Sile’h duna, petrol bena
Semêd petrol mad ‘herb kena
Guinye mezlumun rışnena
Emperyalist ‘Emeriqa

Pê tu nin dunya ‘edalet
En ‘edalet nıu rezalet
Numê xu tu pê zulım vet
Emperyalist ‘Emeriqa

Siyonist kêrd cınawir har
Yın insun ni; kutik biwar
Sê deccal bıa bela dunyar
Emperyalist ‘Emeriqa

‘Emeriqa vuna ma pil
Bıa cenderme qê İsrail
Belê İsrail kerd ma mıl
Emperyalist ‘Emeriqa

Ma hin tu ra qet nıtersên
Allêy xu ra têna tersên
Mezlum hê yên ‘hesab persên
Emperyalist ‘Emeriqa

‘Emeriqa zaf zulım kerd
Ya Rabb! Tı enê yêr meverd
Piorê dunya talun kerd, berd
Emperyalist ‘Emeriqa

En Feqir ho yo vate vun
Tı bızun,Allêy ra ‘eyun
Huma belê yê pênid dun
Emperyalist ‘Emeriqa

7- ‘HEYAT BI PERT

Virus vecya ‘heyat bı pert
Enaz şumar wa yo dersıb
Pıorê dunyad heyat vındert
Enaz şumar wa yo dersıb

Umê yoca reis dunya
Vun: newe yo virus vecya
Ço vun qê dunyê yın ricya
Enaz şumar wa yo dersıb

Yetim kışyê; şuma kêyf kerd
Bun yın vêşê; şuma kêyf kerd
Cigêr pêşe; şuma kêyf kerd
Enaz şumar wa yo dersıb

Şuma pıorê dunya tuna
Guinye en mazlumun rışna
Pıeşmunê fayde nıduna
Enaz şumar wa yo dersıb

Şuma zulım varna sê tir
Pê korona şuma bi cir
En merg, newe kot şuma vir
Enaz şumar wa yo dersıb

Heywax gidi, heywax gidi
Virus şumaraz bi nizdi
Şuma têrs virus ra merdi
Enaz şumar wa yo dersıb

Ena seni yo hawara
Zulim şuma dunyad vara
Zulım bı virus agêra
Enaz şumar wa yo dersıb

Şuma sê cınawir bi har
Sê cınawir kot min en şar
Mazlum kêrd perişun-biwar
Enaz şumar wa yo dersıb

Pıorê dunya şumar nıvet
Axrêt xu ruet dunya guıret
Astê feqir-fuqari kuet
Enaz şumar wa yo dersıb

Şuma zengin kêrd zaf zengin
Feqiriz bi derdin-axin
Pê ‘herbun dunya bi guınin
Enaz şumar wa yo dersıb

Atom eşt Japonyad şuma
Merg varna sêr Hiroşima
‘Hesab şuma vinen Huma
Enaz şumar wa yo dersıb

Ez tu ra vun, tramp-putin
Ez tu ra vun, natin-wetin
Şuma dunya kerda pıntin
Enaz şumar wa yo dersıb

Bun, Mao ra bıger ‘ibret
Lenin’, xu vir mekır elbet
Azrail gun yıniz guret
Enaz şumar wa yo dersıb

Bun, Cengiz o Hulagu ra
Hem talun kerd hemiz şa ra
Yiniz pênid şi itya ra
Enaz şumar wa yo dersıb

Bun: Saddam Helepçe’ sekerd
‘Hama’d Esêd çend zulım kerd
Çıta xu destıd guret, berd
Enaz şumar wa yo dersıb

Ni Nemrud mend, ni Fir‘un mend
Ni Şeddad mend, ni Qarun mend
Yın pê zulım mezêl xu kend
Enaz şumar wa yo dersıb

Ni Napolyon, ni çorçil mend
Hamurabiz qanun xu wend
Şeytun def kua yın zurna cend
Enaz şumar wa yo dersıb

Ni Roma mend ri ‘erdunıd
Niz İngiliz Hindistun’ıd
Ni Bizans mend Qonstantin’ıd
Enaz şumar wa yo dersıb

Zulqerneyn İskender’iz şı
Neron’iz şı Sezar’ız şı
Rezil-mel’un Yezid’iz şı
Enaz şumar wa yo dersıb

Stalin pê guin nıbı mırd
Hitler pê zulım nıbı gırd
Yın ra çik êr nımend warıd
Enaz şumar wa yo dersıb

Ma holur tim ra’hmet unên
Zalımuriz la’net unên
Tarix yin pê ibret unên
Enaz şumar wa yo dersıb

En Feqir ho zazaki vun
Tarixun ra misalun un
Pıorê ‘alem wa bun-bızun
Enaz şumar wa yo dersıb

8-MUDUIR

Bi ruşwet tı sılum nıgên
Mudır! Ruec yen; tı ‘hesab dun.
Eg ruşwet bıb tı sılum gên
Mudır! Ruec yen; tı ‘hesab dun.

Mudır mudır cê xud vındır
Bışermay, wa rıy tuı bıb suır
Tu vêşnen, ce’nımıd adır
Mudır! Ruec yen; tı ‘hesab dun.

Qê zenginur tı bên pılas
Mal dowlet buı vara bımas
‘Herumzedir çinyu xelas
Mudır! Ruec yen; tı ‘hesab dun.

Tı menfe’et xu tena zun
Qê menfe’et tı gun xu dun
Ruêc me’hşêrid bar tu gırun
Mudır! Ruec yen; tı ‘hesab dun.

Çim mudir vêşun, nıben mırd
Meşkê yı pê ‘herum bıa gırd
En vatê mı xur bıkır wırd
Mudır! Ruec yen; tı ‘hesab dun.

9-EZ VUN KAVIR TI VUN KAFIR

Ez vun kavır, tı vun kafır
Tu çımıd lui bia cınawır
Sê darbir tı mekır dırdır
Çuê mına çot, vêr bêr tuıd kot

Ez vun tuerzi, tı vun Durzi
Sarê tu munen yo mazi
Ez seni tu kena razi
Çuê mına çot, vêr bêr tuıd kot

Pê zurun tı xu kên ercun
Ez bıa marazdar o rencun
Guêş xu akır, fêk xu racun
Çuê mına çot, vêr bêr tuıd kot

Ez vun raştıb, tı xu kên çot
Tu dara çot xuir kerda rot
Zurun, tu hin zerrê ma pot
Çuê mına çot, vêr bêr tuıd kot

Mı tu ra va: racun en ber
Ber şikya, bı zıer o zeber
Êr e’hmaqê tuir bia rehber
Çuê mına çot, vêr bêr tuıd kot

Xebera weş tuir bena reş
Vêng mı nin tu, aw bıa tu gueş
Tu new tado qeldo ko şeş
Çuê mına çot, vêr bêr tuıd kot

Feqir vun: Qal mı bi mıqar
Wazên bıqa’r, wazên meqa’r
Wazên bıfatis o bıqarr
Çuê mına çot, vêr bêr tuıd kot