MEWLIDU ZAZAKİ

MUQEDDİME

Ez pê numê Allê dest ken pê

‘Hemd o sena qê Allê. Yı pıorê ‘alêm o insûni pê yo hikmet vıraşti. Aqıl o hikmet do; pê ma ‘heq-batıl ra, hol-xırab ra ciya bıkır o bışınasnı.

Ma salat o selam keni qê peyğımberu pêyini, peğımbêri rehmêti, fexri kâinati ‘Hezreti Mu’hemmed Mustafa ri (sev); ali-ewladi yi ri, se’habiyun, muhacirun, ensarun o ay rayuni gi ‘hetta qıyamet yi dıma şini…

Me’ne kêlimê Mewlidi: Dayi ra bıayışu, umıyayişi dunya o wêlıdyayışu. Min bısılmununı dı me’nê kelimê mewlidi, biya xas qê dayi ra bıayişi peğımbêri ma (sew) o aya şewa gı wı day xuı ra bıyu. Şi’ri gi qê Peğımbêri ma (sew) vacyê ayın ra zi vacyêni:  “mewlid”.

‘Esri  se’adêtı dı şairun der’heqi Peğımbêri (sew) ma o İslamiyêti, qesidê nüşti o ‘huzuri yi dı wêndi. En şairun ra en meşhuri yin, wari Qêsidê Burde Kâ’b. b. Zubeyir'u. Wextı gı wı bıyu bısılmunı o yi aya qêsida wenda, zaf wêşi Resulullahi (sew) şıya o yi xırqê xu yi ri hediye kerda.

Wêxti peğımbêry mara (s.’e. w) pê ‘hetta êr zafy qêsidêy semêdy ‘eşqy pıeğımbêry ma (s.’e. w) o semêdy welidyayişy yı nüsyêg; pê ümmet, peğımbêry xuı bışınasnw o yıra ‘hes bıkw.

        Mewlıdu verinı, 400 ser ba’adi hicrêti, wêxti Fatımıyun'ı dı Mısır’ı dı unyo. O ruec ra pê hetta êrı şewê wêlidyayışi peğımbêri ma (sew), min bısılmununi piyorê dunya dı mewlidi unyêni.

Êr min piyorê bısılmununi dunya dı hemê zununı dı zafi mewlidi êsti.

Dorivêri welati ma dı zununı muxtelifunı dı; ‘erebi, tirki, kurmunci, zazaki o sobina zununı dı mewlidi nusyê o unyêni.

Mewlıdu zazakiwu verin Malla E’hmet Xasi (Allah Re’hmê xuı pêku) miladi serrê 1898’ıd bacary Diyarbekir’id nuişt o serrê 1901’dı zi neşır kerdu. Yi ra pê zi ‘hetta êr çendna ‘hebi mewlidi zazaki nüsyê. Milletê ma en mewlıdun unena, istifade kena. Allah yın ra razibu.

        Guerê Qena’et mı ra mewlıd wendış min bısılmununı dı zaf ‘edetêko rındu. Ayi gi mewlıd unêni o gueşdari keni, bêni wêsile pê muslımuni yêni yoca, yobinunı vinêni, persêni o şınasnêni. Pê enê, binatê yını dı hem ‘heskerdış, ulfet o mu’hebbet vırazyenu; hemi zi eni ra zaf xêr istifade keni. muslumuni, en meclisunı dı din xu museni o zıkır keni. Yıni ri pê en zıkrunı xêr, bereket, fêyz yenu; peğımbêri xuı o dêwê yi şınasnêni o yi ri salawatun unêni, naili şefa’êti yi bêni, Qur’un o nasihat mallun gueşdari keni, din-diyanêti xuı muısêni, yobinunı ri du’un kêni o pê izin Allê nail xêr bêni.

En feqir ‘heta êr, şi’ri muxtelif pê zuni zazakiyê Çolig'i nuişti. Qısmek havalun mı mı ra rica kerd o va: Ma qayili tı yo mewlıdêko zazakiwu fesi’h bınusi; ma bun o fum bıkır.

        Ez Allê ra xêr bereket, muwaffaqiyet; peğımbêr’ra zi (sev) şefa’et wazena. Huma pıyorê xebatuni ma bıçarnu qê rızê xuı. Âmîn…

                              

Abdullah  NARİN

-1-

                             ELFABÊ ZUN ZAZAKİ

‘HERF ZAZAKİ	TE’RİF VÊNG HERFU	MİSAL YIN ZAZAKİ	ME’NÊ YIN TİRKİ
A a	Vêng elfabê tirki “A” dun.	ADIR	ATEŞ
B b	Vêng elfabê tirki “B” dun.	BER	KAPI
C c	Vêng elfabê tirki “C” dun.	CİNİ	KADIN
Ç ç	Vêng elfabê tirki “Ç” dun.	ÇIM	GÖZ
D d	Vêng elfabê tirki “D” dun.	DAR	AĞAÇ
E e	Vêng elfabê tirki “E” dun	ENGUIR	ÜZÜM
F f	Vêng elfabê tirki  “F” dun	FEK	AĞIZ
G g	Vêng elfabê tirki  “G” dun	GA	ÖKÜZ
Ğ ğ	Vêng elfabê ‘erebi  “  غ “(ĞÊN)dun	ĞELA	KITLIK
H h	Vêng elfabê tirki  “H” dun	HAK	YUMURTA
I ı	Vêng elfabê tirki  “I” dun	IMSER	BUYIL
İ i	Vêng elfabê tirki  “İ” dun	İŞLIG	GÖMLEK
J j	Vêng elfabê tirki  “J” dun	MİJDUN	MÜJDE
K k	Vêng elfabê tirki  “K” dun	KERG	TAVUK
L l	Vêng elfabê tirki  “L” dun	LERZ	DEPREM
M m	Vêng elfabê tirki  “M” dun	MUNGA	İNEK
N n	Vêng elfabê tirki  “N” dun	NUN	EKMEK
O o	Vêng elfabê tirki  “O” dun	OR	GEBE
P p	Vêng elfabê tirki  “P” dun	PISİNG	KEDİ
R r	Vêng elfabê tirki  “R” dun	RIZ	PİRİNÇ
S s	Vêng elfabê tirki  “S” dun	SA	ELMA
Ş ş	Vêng elfabê tirki  “Ş” dun	ŞIT	SÜT
T t	Vêng elfabê tirki  “T” dun	TAWIK	KIZAK
U u	Vêng elfabê tirki  “U” dun	GUM	ADIM
V v	Vêng elfabê tirki  “V” dun	VAL	SÖĞÜT
Y y	Vêng elfabê tirki  “Y” dun	YENI	PINAR
Z z	Vêng elfabê tirki  “Z” dun	ZINC	BURUN
Q q	Vêng elfabê ‘erebi   “  ق “ (QAF)dun	QEDIM	KESER
X x	Vêng elfabê ‘erebi   “خ"  (XÊ))dun	XOX	ŞEFTALİ
W w	Vêng elfabê ‘erebi   “و “(WAW)dun	WARI	YAYLA
‘H ‘h	Vêng elfabê ‘erebi   “ح “(‘HÊ)dun	‘HESIR	GÖZYAŞI
‘	Vêng elfabê ‘erebi   “ع “  (‘ÊYN)dun	‘ERD	YER
Ê ê	Ena ‘herf bınêna barı vêcyena se ‘herfê “ E “	KÊNA	KIZ
IA ıa	Yo hêced vêng “IYA” dun	DIAR	YUKARI
IE ıe	Yo hêced vêng “IYE” dun	DIES	DUVAR
IO ıo	Yo hêced vêng “IYO” dun	PIOR	HEP
IU ıu	Yo hêced vêng “IYU” dun	PIUNZ	SOĞAN
UA ua	Yo hêced vêng “UWA” dun	GUAZ	CEVİZ
UE ue	Yo hêced vêng “UWE” dun	GUEŞ	KULAK
UI uı	Yo hêced vêng “UWI” dun	XUIRT	ŞİŞMAN
Uİ ui	Yo hêced vêng  “UWİ” dun	LUİ	TİLKİ

       

                                                       

                                            -2-

Rabbul Alemin (celle celaluh) Qur’unıd wat:

اِنَّ اللّٰهَ وَمَلٰٓئِكَتَهُ يُصَلُّونَ عَلَى النَّبِيِّۜ

  يَٓا اَيُّهَا الَّذ۪ينَ اٰمَنُوا صَلُّوا عَلَيْهِ وَسَلِّمُوا تَسْل۪يماً

                                              

  “Mu’heqqeq Allê o melekun Pıeğımbêri ri  salati ardi. Gellê mu’minun! En sebêb ra şuma zi yi ri salat o selam bıyarênı.”   

                                                                                (Surê E’hzâb; 56)

        

  Peyğembêri ma Mu’hemmed (s.’e.w) vatu:

لاَ يُؤْمِنُ أَحَدُكُمْ حَتَى أَكُونَ أَحَبَ إِلَيْهِ مِنْ وَالِدِهِ وَوَلَدِهِ وَالنَّاسِ أَجْمَعِينَ

         “Şumara yo heta dayi-babi xuı ra, kê xuı ra,

qıcuni xuı ra o pıyore insunun ra zıyedê mı hes nıkıru, mu’min nıbenu.”

                                                                            (Buhârî, kitab İman)

       

       

-3-

        MEWLİDY NEBİ (S.A.V)

Mı dest kerd mewlid nebi pê bismillah

Xeyr rasen en cemâ’et  inşa Allah

“İkre’ bismi rabbike” (*) vat Humê ma

Semêd de’wêt icâbet kerd, umê ma

Qıcun, pilun, dor cirunun de’wetık

Buxur, şerbet o ziyafet 'hezırık

En bırê ma umê itya qê zikir

Pê zıkır mezel ben hira qê feqir

Çı wazên yi ra bıwaz, bi, dêst xuı  ak

Kumıg Humê zıkır bık qêlb yı ben pak,

Holê bık holê tim hola ey bıra

Qê feqirun sadeqe bıd mal xuı ra

Zikir Allêy tim bereket un tuı ri

Kibir mek teslimıb qê qudrêt yi ri

Rabbul ‘Âleminir bık ‘hemd o sena

Belê Sûrê Fâti’had esta ena

Yı ma kêrd insun, yı dê ma zaf ni’mêt

En ni’mêt yı nin umartış  çend ‘edêt

‘Hemd qê Allêy; da ma dini İslumi

Yı şırawıt mar peğemberêk ummi

Ra’hmê yi zafa qê ma; nina ‘hisab

Re’hmê xu ra şırawıt mar yo kitab

Her nefês xuıd ma vun el’hemdu lillah

Şêr Şeytun ra ma vun ne’ûzu billah

Ez vun Alah qadir, Allah qê ma bes

Kumıg Allê ra nıters tim ben nekes

Allah bes ğêyr yı ‘abes qê islumun

Zerê şuma wa bıvêş qê mezlumun

Biizin yi dar ra yo pel ninu war

Bizikir yi heywax! qêlb tuı ben biwar

---

 (*) “Pê numi Rabbi xuı bun.” (Surê ‘Elex, ayêt 1’ın)

                                -4-

Wı yow, yowê yı ra ma şubhe nıkên

“Eşhedu”  vun ma enêr şehadet kên

Qêlb kumid bıb guerê yo dêrzin imun

Yi ra tersên dunyad pıorê zalımun

Kumid çinyu imun  rabbul ‘alemin

‘Hal yı ben zaf xırabiz, hêywax lemın!

“Allah zaf pil” vun ma karşi kafırund

Ters vırazyen pê enê qêlb zâlımund

Allah zaf pil, pilê yir ‘hesab çinyu

Eg tı enê bızun tuır ‘ezab çinyu

Yo duerımêk zêrr ra ‘eşq ra  vac Allah

Pıorê guınun tuı rışyen pê iznillah

Ma imun kerd, ma vun Allahu ekber

Enê ra dım ma vun: “Mu’hemmed rehber”

Bıerên ma qê ‘eşq Allêy ‘hesrun warık

‘Eşq Allêy xuir pırd siratid rehberık

Allah est, bi yı çinyu yona Huma  

Mu’hemmed’iz (sav) qasidi yiw, zun şuma

Ma imun kerd Allêy ma pil pilunu

Mu’hemmed’iz (sav) pıeğımber ğeribunu

Ma tesdiq kên la ilahe illallah

Hem qebul kên Mu’hemmed (sav) Resulullah

Allah vatış ben ilaç qê qelbi ma

Mu’hemmed’iz (sav) şefa’et  ken qê şuma

E’hmed o Me’hmud Mu’hemmed Mustafa

Yı qê ummetê xuı unta zaf cefa

Allêy vicna wı kerd peğembêri ma

Ma tesdiq kên Mu’hemmed (sav) rehberi ma

Xatemul enbiyaw, peğember pêyın

Peğembêr ma dım yona peğember nin

Ma tesdiq kên Mu’hemmed (sav) Resulullah

Tı bırasn ma şefa’et yı ya Allah! 

                 

                        -5-

Ya Rabbi ma tuı ra tim wazên imun

Mu’hemmêd’ir (sav) bık ma cennetıd cirun

Eg şuma wazên Cehennêm ra necat

Zêrr ra vacên qê Mu’hemmêd (sav): essalat

Gelê bırun yo wesiyyet ken şumar

Vêr mêrg, ma xêr bık, ena munena mar

Nızdi ra ‘emir vıeren ma dun ‘hesab

Ruêc ‘hesab ho yen ma seni dun cewab

Ruêc ‘hesab axretıd kitab tuı aben

Mevac “ya leyteni kuntu türaben”(*)

Bıerên êr ma qê Allêy destun akên

En fexir şuma ra hivyê du’un ken

Destun ak, sare çotık, ‘hesrun warık

De bi vac: “El-fâti’ha” destun berzık

Eg şuma wazên Cehennêm ra necat

Zêrra vacên qê Mu’hemmêd (sav): essalat

Amina Xatun dayê Mu’hemmêd’ya (sav)

Ba’ad wefat ‘Ebdullêh ume dunya

Amina bin Wehb’a numê dayi yı

‘Ebdulmuttalibu numê pirik yı

Babi yı merd wı yetim mend babi ra

Yetim zuni yetimê çendiz zuara

Wefat kerd ‘Ebdullah bacar Medina’d

Xalun yı, mezelıd defın kerd ucad

Duıyês rebiul ewwêlid wêlidya

Nurêk ume Mekke’d aya şew dunya

Pirik yı nume na pa va: “Mu’hemmed “(sav)

Peyğemberun mijdun da va: “yen E’hmed”

Şoqêk da şewê dışemi sêr Mêkki

Şar Mêkki zaf şaş bı nızuna sêki

---

(*) “Heywax! Werrı mı, ez bıbin herr!" (Surê Nebe’, ayet 40’ın)

                         

                           -6-

Pıorê puıtun Ka’be’d fêk ser gınê ‘erd

Saltanat puıtun qêdya ilelebed

Adir din Mecusiyun cad şı huna

Zaf mu’cizê êst aya şew, ez zuna

Aya şew kuêşk zaf  ‘hukumdarun rıcyê

Awê guellê memlekêt Sewa uncyê

Amina va: Aya şew mı zaf çik di

Mı yona hew o qêde hikmêt nidi.

Umê ‘ezmun ra melekêt saf o saf

Dorvêr bun mı kerdên sê Kâ’bi tawaf

Numê ya sündüsıb aya yo melek

Sündüs kerd ra hawa ra mir yo dueşek

‘Huri cennêt umê dorvêr mı guıret

Va: “Ma umê qê Mu’hemmêd (sav) ziyaret”

‘Ezmûn bi a, yo nurêk ume ‘âlem

Nuştiş enêr ‘ecıs munena qelem

Meleketun vênda va: “ya Amina!

In qêdı qıc yona dadi nıvina”

Amina va aya şew dıes bı dıcê

Zerê en dıês ra hiri ‘huri vecyê

Ez tuı ri vac ay hiri ‘huri kumib

Asiyab yo, yewa biniz Meryem’ib

‘Huriya biniz mı di ya zaf rındib

Sê aya rınd ‘huri mı cekıd nıdib

En hiri ‘huri umê vêr mıd vındêrt

Sarê ra pay wıcud mı ra guıret dert

Aya şew zaf ‘huri umê ‘ezmun ra

Zerê kê mı bı sê ruêc o nur yın ra

Ay ‘huriyun dênê yobinun mijdun

Sê yı yona qıcêk nıdyu ri ‘erdun

Vatên: “Ya Amina! Ma tuı tebrik kên

‘Eşq Mu’hemmêd ra (sav) ma nızun hê sekên”

                            -7-

İnsun, melêk ‘aşiq en Mu’hemmêd’i (sav)

Felek ha dor kena qê ‘eşq ‘Ehmêd’i (sav)

Ena şew zaf mübarek yo şewêka

Ma zun, tı dadiya zaf mubareka

Ena şew bêr re’hmêt  ‘ezmunun abên

Kum çı du’un bıkır yı ra qebul bên

Huriyun zaf wasif Mu’hemmêd (sav) umart

Va: “Allêy do tuı en eşrêf mexluqat”

Re’hmeten lil ‘alemin, en laci tuı

Hem şefi’el muznibin, en laci tuı

Amina va: o wextıg ez wêlidya

Mı zuna Mu’hemmed (sav)  şeref dun dunya

Ez bıa teşun, huriyun da mı şerbet

Mı şımıt, o şerbetıd bıb zaf lezzet

Huriyun va: En şerbetıg tuı şımıt

Qat xuı ra tuir Rabburrahim  şırawıt

Sê vora pak sıpib, zafiz serdınıb

Tum yiz weşıb, o tum, mı cênad nıdib

Umê yo tıêra sıpi pê mıd vındert

Paştê mı weş vılina mıd nımend dert

Ume dunya Mu’hemmed padişê din

Nur E’hmêd ra zulumat ‘alem bı vin

Ume dunya Mu’hemmed xeyrul enam

Ey cema’et wuırzên pay qê ihtiram

Eg şuma wazên Cehennêm ra necat

Zêrra vacên qê Mu’hemmêd (sav): essalat

Wextıg ume dunya Resul Mucteba

Hemê mexluq ume ‘eşq, va: merheba

Vênda ‘erd ra ‘ezmun hemê mexluqat

“Ehlen we sehlen” va, pıorê mewcudat

Mer’heba ya Sadıqel we’edil emin

Mer’heba ya Re’hmetel lil ‘alemin

                    

        -8-

Mer’heba tı wari en dini mubin

Tı ummetir bên Şefi’ul müznibin

Mer’heba tuir ya Mu’hemmed Mustefa (sav)

Semêd ummet tuı unta gellêk cefa

Mer’heba tuir ya Emine We’hyillah

Tuı şeref da ‘âlem ya ‘Hebiballah

Xeyr umi tı sari çımun ser umi

Belê, ma zun tı yo peyğember ummi

Xêr umê tı ya Mu’hemmed’el Emin (sav)

Emir tuı sê emir Rabbul ‘Alemin

Belê, tı ben war qê pıorê biwarun

Tı şefa’et kên qê ma gunekarun

Xêr umi tı, ey rehberi rari ma!

Ma sekên ruêc Me’hşêr, tı vêc wari ma

Allah vun: “ya ‘Hebib!” Peyğembêr ma ra

Mu’hemmed (sav) ben çare pê ğem şıer ma ra

Wallahi, tı dermun dêrd ‘aşıqunê

Billahi, tı çarê qê mexluqunê

Ma tuı ra meğfiret wazên ya Allah

Heywax! Medet, imdat ya Şefi’ellah

Salat selam bunıên qê seyyidi ma

‘Hınzar salat selam qê efendi ma

Eg şuma wazên Cehennêm ra necat

Zêrra vacên qê Mu’hemmêd (sav): essalat

Ya İlahi! Tuı vat " mir duı'u bıkên
Suêz mınu, duı'u şuma ez qebul ken"(*)

Allah vun: ”Ud’ûnî estecib lekum”

Du’a qebul bena, zerr ra  bıwaz kum

Ya İlahi! Ce’do hol ra ma şaş mek

Nêfs o Şeytuni recim dıma kaş mek

---

(*)(Surê Mu’min, ayêt :60)

(**) Mir du’u bıkenig ez du’u şuma qebul bik. (Surê Mu’min, ayêt :60)

                       

                           -9-

Ya İlahi! Ma rar xuı ser daimık

Din İslumi sêr en 'erdud qaimık

Ya İlahi! ‘Hal ma xırab, pêrişun

Âx o wax kên, ma guınun xuı ra pueşmun

Ya İlahi! Ma bık haval weliyun
Cennetıd bık unbaz pıorê nebiyun

Meğfiret bık ma, me’hşerıd pueşmun mek
Muxennetunriz mu’htac o dêndar mek

Qebra tari mar sê yo dêştık, hirak
Rahmê tuı zafa, mezêl ma sê çılak

Ma tuır dêst kê a, duı'un ma qabul bık
Hem sê duı’un resulun xuı meqbulık

Ya Rabbi! Ma zunig tı pil pilunê
Tı çarê qê en quılun, ‘ebdalunê

Şifa bıd qê darbıcun nıweşun ma
Dên dayışiz re’hetık qê bırun ma

Ma zunık tı qadir pil, ma 'âcizye,
Tı zengin, sexiyê; ma zaf feqirye

Ma İslumyê; ‘hemd o sena qê Allêr
Salat selam her daim qê Peyğembêr

Pıorê meyıtun ma 'ef-meğfiret bık
Cennetıdiz haval  Pıeğımberunık 

Adir Cehennêm ra ma xelas wazên

Hemê ‘ibadetund, ma ixlas wazên

Ya Rebb! Ma bıd xatir merdımun holu

Qe xatir mekanun, zemunun holu

‘Ef bık ma qe xatir Mekke, Medina

Quds o Ka’be, Safa, Merwe o Mina

Qê xatir Turi Sina, Beyti Me’mur

Dunya tengık kafırunir, zalımur

Meğfiret bık ma, ya Rabbel ‘alemin

Bıerên, şuma en du’ur vacên: Amin

                          -10-

       

Eg şuma wazên Cehennêm ra necat

Zêrra vacên qê Mu’hemmêd (sav): essalat

                 م  م

                  م

En mewlid Nebi nusya Dareyeni'd

Serrê dı hınzar des hot, aşme çellid

Xêr en mewlid rasen ma İnşaallah

Cennetıd kewser nasib mak Ya Allah!

         

-11-

DU’Ê WEWLİD

 أعوذ بالله من الشيطان الرجيم

    بسم الله الرحمن الرحيم  

اَلْحَمدُ للهِ رَبِّ الْعاَلَمِينَ وَ الْعاَقِبَةُ لِلْمُتَّقِينَ وَلاَعُدْواَنَ اِلاَّعَلَي الظَّالِمِينَ

وَ الصَّلاَةُوَ السَّلامُ عَلَي رَسوُلِناَ مُحَمَّدٍ وَعَليَ آلِهِ وَصَحْبِهِ اَجْمَعِين

رَبَّناَتَقَبَّلْ مِنّاَ اِنّكَ اَنْتَ السَّمِيعُ الْعَليِمُ

وَتُبْ عَلَيْناَ ياَمَوْلاَناَ اِنَّكَ اَنْتَ التَّوّاَبُ الرّحِيمُ

واهْدِناَ وَوَفِّقْناَ اِليَ الْحَقِّ وَاِليَ طَرِيقٍ مُسْتَقِيمِ

وَاعْفُ عَنّاَ ياَ كَرِيمُ ّوَاعْفُ عَنّاَ ياَ رَحِيم

وَغْفِرْ لَناَ ذُنوُبَناَ بِفَضلِكَ وَكَرَمِكَ ياَ اَكْرَمَ الاَكْرَ مِينَ واياَ اَرحَمَ الراَحِمِنَ

Ya Allahu, ya Re’hmanu, ya Re’him, Ya Ferdu, ya ‘Heyyu, ya Qeyyum,

Ya ‘Hekemu, ya ‘Edlu, ya Quddus,

Ya Rabbi!..Tuı qur'un Kerim’ıd vat " mir duı'un bıkên; Suez mıno, duı'u şıma ez qabul ken" ;   Ma dest kê a,  du’un ma qebul bıkır

İlahi Ya Rabbi! Tı qê xatir en new numun xuı İsmu ‘Azam kên,

O tı qê xatir newê new numun xuı Esmaul ‘Husna kên,

Ya Rabbi! Tı qê xatir merdımun holu, qê xatir zamunun holu, qê xatir mekânun holu, qê xatir Mekke, Medina, Quds o Ka’be, Safa-Merwe, Muzdelife, Mina, ‘Erefat, Turi Sina, Beyti Me’mur, Beyti Muqeddês kên,

Ya Rabbi! Tı qê xatir en pıorın kên,

Ya Rabbi! Tı en cema’et ma xuır quıl qebul bıkir, ‘Hebib xuır ummet qebul bıkir, Qur’âni Kerim’ir talebe qebul bıkir,

Ya Rabbi! Tı ma nail şefa’et ruecê Remezun, Leyle i Qedr bıkir.

Ya Rabbi! Tı ma nail şefa’et Qur’âni Kerim o şefa’et Mu’hemmed Mustafa (sav) bıkir.

İlahi Ya Rabbi! Tı ma şêr şerrun ra, şêr insunun ra, ‘heywunun ra,, cındun ra , şeytunun ra, si’hirbazun ra, ‘hesudun ra, fesadun ra, qezun trafik ra, zelzelun ra, vêşunê ra, têşunê ra, ğela ra, laserun ra; hemê belayun ra paw, mu’hafaza bıkir.

-12-

Ya Rabbi! Tı belê ma çoy mılır nik; belê çoyiz ma nısaw.

Ya Rabbi! Tı ma çoy dêst nıfin,çoyiz ma dêst nıfin.

        Ya Rabbi tı aya qebra tenga tarid ma biwar nıvêrd,

İmun kamıl, ‘emelu salı’h, exlaqu hol  qebra tenga tarid tı mar haval bıkir.

        Ya Rabbi!... tı ma, rar reyşt ra şaş mek, Nefs o şeytun dıma kaş mek
        Ya Rabbi!.. Ma sırat muteqimıd daimık, Din İslumê şerg ra ğerb ri 'erdud qaimık.
        Ya Rabbi!.. Ma guınun xuı ra zaf pueşmunyê, ‘hal ma xırab, ma perişunyê
        Ya Rabbi!.. Ma 'ef bıkır, me’hşerıd şermzar mekır, Muxennetur muhtaç o dêndar mekır
        Ya Rabbi!.. Qebra tenga tari mar hirak; sê dêştık, pê rahmê xuı sê çıla reyştık
        Ya Rabbi!.. Ma dêst kê a duı'un ma qabulık, Sê duı'un resul xuı meqbulık

        Ya Rabbi!.. Ma Cennetıd haval o cirun, salıhun, ewliyun o nebiyunık.
        Ya Rabbi!..Ma zunig tı zaf pil; pil pillunyê, ti çarê qê ma qullun 'acızunyê.
        Ya Rabbi!..Şifa bıd qê darbıcun nıweşun ma, Dên eda kerdış rehetık, qê bırun ma
        Ya Rabbi!.. Ma zunık tı qadir, pil; ma 'acizye, Zengin, sexi tiy; ma zaf feqirye
        Ya Rabbi!.. Ma bısılmunê; ‘hemd, sena qê tuı, Salat o selam qê peyğembêr tuı
        Ya Rabbi!.. Pıore meyıtun ma 'ef-meğfiret bık, Cennetıd    haval  pıeğımberunık
        Ya Rabbi!.. Ma dunyadiz, axretdiz holi wazên',
'ezab cehennêm raz xellas wazên

        Ya Rabbi! Wel’hasıl; Pıeğımbêr ma tuı ra çına waşt maz ayin wazên,

Pıeğımbêr ma tuı ra çına nıwaşt maz ayın nıwazên,   Tı qê ma qebul bıkır

سُبْحأنَ رَبِّكَ رَبِّ الْعِزَّتِ عَمّأَ يَصِفُؤنَ. وَ سَلأَمٌ عَلَى الْمُرْسَلِىنَ   وَالْحَمْدُ لِلَّه رَبِّ الْعَألَمِينَ.

Selametê din o dunyê mar, qê re’hetê qelbun mar, qê huzur  memlekêt hemê islumu, sı’h’hat ‘afiyêt weşun mar, şifê nıweşun mar, ‘ef meğfirêt meyitun mar, berekêt rızqun mar, isla’hê ewladun mar, qê rızê Allahu tealêr  ELFATİ’HA!...

-13-