Numê Ma Kumê Mawu

1            Çolig
2            Awê Murad
3            Dareyeni
4            Xuêrt Çolig
5            ‘Hecyun
6            Kelaxsı
7            Siwun
8            Germaw
9            Gaz
10          Luetun
11          Yexkig
12          Zıktê

 

1-ÇOLİG

Râr Çolig zaf ze'hmêtye
İnsun yin biminnêtye
Kuê yı pıor sê cennêtye
Bi Çolig, bıgêr bıra

Çolig vêrin lerz berda
Xu dıma çik nıverda
Ma awê kurık werda
Çarrê bibaxt meb bıra

Bacar Çolig bıu dıcê
Zaf insun ma ra vêcyê
Pıore insun ni sêcyê
Ma zaf sexiyê bıra

Derê Çolig zaf çetın
Cumyêrdir ramayış çin
Merdım terês pê ters şın
Hêywax!.. Teres meb bıra

Çolig’id êst zaf şehid
Ez pêşa min en dêrdid
Bi runış vêr en yênid
Yenıd aw bışım bıra

Bi Çolig, şu vêr Murad
Saro nerm hol; mek ‘inad
Ey war ‘eşir tı hê çad
Rar raşt ra şaş meb bıra

Herrê Çolig yo çenga
Dostê qê ‘hella tenga
Dunya dı ruêcya, venga
Dunya dıma mek bıra

En Feqir vun: Ya Allah
Tı yên Çolig, inşaallah
Zaf rınd Çolig, maşallah
Çolig’ra ‘hes bık bıra

 

2-AWÊ MURAD

Ez kıştê Murad’id gawuna
Sodê xu pê dıerun vuna
Pê en ‘eşq zaf pêrişuna
Ey Murad! Tı awê‘heyat.

Ben zımıstun, murad cemdyen
Wısar, wı pê‘eşq mı ‘helyen
Tija aşmıd rınd berıqyen
Ey Murad! Tı awê‘heyat.

Kênê Qılar ha bermena
Kiştê muradid gêrena
‘Eşq xu ra qet nıvyerena
Ey Murad! Tı awê‘heyat.

‘Eşq ho mıd soda ha tuıd
Derd ho tud dermun ho mıd
Lac Qılar ho wevêr owkıd
Ey Murad! Tı awê‘heyat.

En Feqir nızun, sêk itıad
Alley ra wazen xur murad
Kum en ‘eşq ra yı ken azad?
Ey Murad! Tı awê‘heyat.

 

3-DAREYENİ

Darêyêni’d êst punc şeş pird
Ma pıor bırê, ‘erêb, tirk, kird
Pizê çım vêşun nıben mırd
Bi, Warê Kuê Sıpi’d, bigêr

Darêyêni’d esta yo dêşt
Min dêştıd ma bacar vırêşt
Ce’de Alley yo ce’do rêşt
Bi, warê Kuê Çotla’d, bıgêr

Kuê Qılar ho Darêyêni’d
Kênê Qılar ha per binıd
Kelima ‘hek ha min enid
Kıştê ruê Murad’id bigêr

Darêyêni’d esta tirun
Cirun muhtaç wellê cirun
Şar ma munen ağun, mirun
Bi, Çuxurme’hla’diz bigêr

Darêyêni ra ma vun: Genc
Ma xezina dıa ‘hellê renc
Zaf xebêr med; hovêr bısenc
Qelê Gênc  vêrinid, bigêr

Darêyêni bacar kıhun
Kupar’iz ho pêr ruej awun
Merdım rencber, merdım gawun
Ma şı Weldaşun’ıd bigêr

Darêyêni ra ma ‘hes kên
Mezêl mar bên pênid meskên
En Feqir şin ucad sekên
Ma, vêr Mezêl Quba’d, bigêr

4-XUÊRT ÇOLİG

Ez xuêrt çoligya,
laj cumıerduna

Quwêt mı yen awkê Çotla ra.
Murad ra mı şımıta owkê ‘heyat,
Sê Kuê Sıpi sarê mı tik.
War şerêfir ez sê pılas ri ‘erduna

Ez xuêrt Çolig’ya,
Bırê cumıerduna

'Eşq mı yen Şarık- Şiwun ra
‘Eşqıd vêşa ez, Qere Ce'nım’ıd
Vêşayêya ‘eşq Mem’o Zin’ıd
‘Egitur ‘egit, biwarur paşta; mir saw o ga yowa

Ez xuêrt Çolig’ya
War derduna

Wısar ra ‘hetta payiz gêrena sêr delavun ra
Kuê Şerefdin ra mı guıret şeref,
Owkê Murad mir bıa murad
Qıcir qıc, pil het pil, merdimun zunayun het nezuna

Ez xuêrt Çolig’ya
Haval cumyerduna

Ez ağaya, bega, ez 'eşira
Mınnêt mı çinyu muxennetun ra
Dêrd bırun xur dermuna
Ez duêstur duest; duşmênur sê tirê tirkemunya

Ez xuêrt Çolig’ya
Datzê cumyerduna

Darêyêni'd ez azada ğurbetıd ğemgina
Kê xud xunedun, min şarid me’hqula
‘Heqir mil mı barıw,
Ne’hequr nucıkê mı sê tuerzinya.

Ez, Allêr têna secde ken;
Bi Alley yonêr mınnet nıken…

5- ‘HECYUN

Numê dewê mı ‘Hecyun’o
Cirun dewê mı Qeşun’o
Lewê sêr ra şın Xêlun’o
Bi, ma şı lewê Tecwari

Ma zun pirik ma ‘Ebbasi
Rar yın ra şu, xu mek asi
Dewıcun xu bık şınasi
Bi ma şı lewê Kuê Sıpi

İtyara vun: Derê ‘Hecyun
Gılbe’ra hê vıerên rayun
Ez raşt vun Allê ra ‘eyun
Bi ma şı tırbê ‘Hec Me’hmud

Pirik ma umo Beğdad ra
Ma, bi muhacir yo derd ra
Dayk qıcê xu pawıt serd ra
Bi ma şı lewê kuê ‘Hecyun

En Feqir tim ho yo ‘eşqıd
Daykê mı luel pot bin toqıd
Lac mı! Tim ‘inad bık ‘heqıd
Bi, ma lez şı dewê ‘Hecyun

6-KELAXSI

Kelaxsı’w numê dewêma
Wextêk ityad bıu vêwê ma
La gellek pila de’wê ma
Kelaxsı zaf rınd yo dewa

Kuê Se’bi ho vêr Kelaxsi’d
Duêş ha pêr wevêr Kelaxsi’d
Qeşun’iz ho cıêr Kelaxsi’d
Kelaxsı zaf pil yo dewa

Çıraxırab ha kiştê ruêd
Yenı Sıpi ben sê cemêd
Bi Kelaxsı, zaf xebêr med
Kelaxsı verin yo dewa

Dewê mı munena cennet
Qubê Şıêx tim bık ziyaret
Pirik Babêr mek xıyanet
Kelaxsı hira yo dewa

Ziarêt Fetıl ho bin duêşıd
Şu tê du’a bık nıwêşid
Qedir gun xu bızun weşid
Kelaxsı nızdi yo dewa

Bin kuê ma ra yo awk yena
Guella Marın ra vıerena
Şına Horselı’d vêcyena
Kelaxsı zaf berz yo dewa

En Feqir zun ha sebena
Dunya dı ruêcya vıerena
Çetınê, re’hetê una
Kelaxsı delal yo dewa

7-SİWUN

Siwun’ıd yo me'nêk esta
Numê Siwun Şiwun ra yen
Warê Kuê Sıpi sê dêşta
Numê Siwun Şiwun ra yen

Siwun’d êst hirıs hirye dêw
Ma rumên ğelle, kuryek, cew
Bi biger Siwun’d ruec o şew
Numê Siwun Şiwun ra yen

Xêylun’ıd êst yo çend me’hlê
Yın ra tim vêcyên pil mallê
Kuê ma zaf rind, sê yo vıllê
Numê Siwun Şiwun ra yen

Heydun, Kuzık, Bazyun, Rızwun
Melekun, Sıesmalun, Qeşun
Şar dewun ma zaf xunedun
Numê Siwun Şiwun ra yen

Xalwêlyun, Mehmudun, Unyek
Gaz o Tinıg xu vira mek
Betal megêr bık yo karêk
Numê Siwun Şiwun ra yen

Xıraba, ‘Heşbuer, Kelaxsı;
Matarun’cu bık şınasi
Dadi babir tı meb asi
Numê Siwun Şiwun ra yen

Bi ma en dewuniz bumar
Avdelun, Saferun, Seyar
Dewê Sıerbê bıa ne’hya mar
Numê Siwun Şiwun ra yen

Aldun dewêka zaf rında
Yo dew Gawerun; yoz Ğeyd’a
Fatrekuem’iz dewa gırda
Numê Siwun Şiwun ra yen

Çıraxırab ha kıştê ruêd
Zımag o wışkçuır, hê pê kuêd
Sê Vıllık dew mı nıdya cêd
Numê Siwun Şiwun ra yen

Qusur mı ra me un bıra
Mı yo çend dêw kêrd xu vira
Dunya pê duêstun bık hira
Numê Siwun Şiwun ra yen

En Feqir vun: Ez çaraya
Dewê Siwun ‘Hecyun raya
Şarık wayêkê Şiwun'ya
Numê Siwun Şiwun ra yen       

    8-GERMAW

Germa derdun mar şifaya
Germa’ıd zaf şifa esta.
Pıore derdun mar dewaya
Germaw’ıd zaf şifa esta.

Dı çuımê aw bin kuê ra yên
Yo çımera ma aw şımên
Ma pê çımo germın xu şuên
Germaw’ıd zaf şifa esta.

Sıefkarun’ıd ma gawunyê
Çun o Ferxun’ıd rayunyê
‘Hemumun’ıd sê ağunyê
Germaw’ıd zaf şifa esta.

Elekrag’ıd ez rencbera
Karyerıca, zaf karkera
Kuesıca ha Germaw sera
Germaw’ıd zaf şifa esta.

Belzericiz kê xud xunedun
Nun o awê xu zêrr ra dun
Germaw zaf şifaya ma zun
Germaw’ıd zaf şifa esta.

Armelu dewê Sêydê’ya
Dewêka ‘esılzadeya
Ez pê nıwêşi nalaya
Germaw’ıd zaf şifa esta.

Hacyunic mar zaf ‘hurmetkar
Xelifunic mı di dindar
Germaw ra pê serd ben zırar
Germaw’ıd zaf şifa esta.

Yenıw Serdın’d est ziyafet
Sıeğı’d qorme ben ‘afiyet
Dewê Arçuk bık ziyaret
Germaw’ıd zaf şifa esta.

En Feqir zazaki nusen
Gêren numê dewun musen
Humê ra ‘afiyet wazen
Germaw’ıd zaf şifa esta.

9-GAZ

Bıra! Bi ma şı dewê Gaz
Ma Gaz’ıd xur qunax vıraz
Dewıcun xur holê bıwaz
Gazıcud zaf merdim hol êst

Awê ‘Hemek çar çumêya
Sura, guzına, şifaya
Ez semêd şifa umêya
Kuêyun Gaz’id zaf şifê êst.

Ruecêk bi şu mazrê Çırık
Ma Guert’ıd bışım suncırık
Mezrê Kerru’d guazun warık
Dewê Gaz’id çar mazrê êst.

Vêr Dızık ra şu Vêr Wısun
Vêr Newu ra şu ‘El ‘Heşun
Derê Hezaz’id bık rueşun
Zerê Gaz’id zaf me’hlê êst.

Vêr Say’ıd ez yo şuneya
Kal Me’hu’nıd ez ağaya
Xalun’ra Surın rayuna
Zerê Gaz’id hot me’hlê êst.

Şah Quıli pirik ma vêrin
Me’hemmed pirik ma diyin
Ulaş o Ğaj pirik pêyin
‘Esıl mad yo ‘esalet est.

En Feqir dewun ra gêren
Tarixy pıorê dewu unen
Qê peyınun yo ‘herf rumen
Mezêl Gaz’id yo tarix êst

10-LUETUN

Bıra! Tı zun; ez çaraya?
Dewê wevêr, Luetun raya
Rındê Luetun sê xelaya
En vatê mı, xu vira mek

Bıra, bırêr tim ben sê paşt
Rar xu pê bırati bık raşt
Humê ma ra birati waşt
Bırayun din, xu vira mek

Ena dew Lutfi na pıera
Neslê ma umêya yı ra
Ma bi vıla, ma bi hira
Pirık Lutfi, xu vira mek

Ez, zaf memleketun gêra
‘Hesrêt dew, nışın mı vira
Pê duestun dunya bık hira
En vatê mı, xu vira mek

Qubê şıêx, tim bık ziyaret
Himmêt yı ra bıwaz medet
Holê, merdim bena cennet
En vatê mı xu vira mek

Dıarbek’ıd ma san’et musê
San’etıd qena’et musê
Hem ğurbetıd ‘heyat musê
En vatê mı, xu vira mek

Madrag, Tıêrek Musyun Muşek
Vılware, Mıalun o Çuelek
Tı pê holê bên mubarek
En vatê mı, xu vira mek

Dewic ma merdımin, delal
Umê dew semêd festiwal
Qıcyo extyar bi sê haval
Bi, havalti xu vira mek

Ma ‘Hesibeg’ıd gêrên
Ziyarêt Têpira vıerên
‘Aqrebun xu ra nıvyerên
‘Aqrabati xu vira mek

Lewê Buni’d, Lewê ‘Hoşid
Dewê Piru, Warê Say’ıd
Dêrd-kedêr xu ityad vayıd
Bi, qıl qılyek xu vira mek

Cebexçur ra Topal ‘Hesen
Qedayıf Akko ra musen
Her çi en westê ra persen
Topal ‘Hesên, xu vira mek

Ma tim vırazên qedayıf
Pê en san’et ma bi ‘arif
Tı, ‘arifir mekır te’rif
‘İlim-‘irfun, xu vira mek

Se’id Atun, yo dıerbazıb
Dıerbazıb, hem guevendbazıb
Ma zun, herkes yı ra razib
Yir fati’hêk xu vira mek

En Feqir, Alzek’ıd runışt
Awê Alzek fırr kerd, şımıt
Hem şımıt, hem en şi’ir nuışt
Awê Alzek xu vira mek

11-YEXKİG

Haval! Bi gueşdari bıkır
Numê dewun xu vir mekır
Mêzg xu ak, en vate dekır
Ena destunê Yexkig’ya

Dılıstun munen gulistun
Hem emnun rınd hem zımıstun
Yın rumên qawın o bostun
İtya mıttıqê Yexkig’ya

Laver sanki munen cennet
Çumêyêni’z rında elbet
Dewa Kun’iz bık ziyaret
Bırnek’iz dewê Yexkig’ya

Sê ‘Ulya çinya yona dew
Vartağ’raz ‘hes bıkır kezew
Lerpi’diz bıgêr ruec o şew
Yekmal yo dewê Yexkig’ya

Dewê ‘Weli, Pirıf, Bırnek
Wekê ‘Eli’z xu vira mek
Qeşa ra bıgêr, bi De’lek
Xuezderê’z dewê Yexkig’ya

Mergê Lavêr ra Gazbawun
Nexçirıg ra ‘hetta Bawun
Ma hem recbêryê, hem gawun
Qelderı’z dewê Yexkig’ya

Bi Dewa Kuna Bınin’iz
Bıgêr Şıqê Dılıstun’iz
Derê ‘Ewas’yo, Sıê ‘Eli’z
Ena ‘eşirê Yexkig’ya

Rotçun dewêka zaf pila
Derê ne’hu sanki vılla
Deştê ‘Emu’z mir sê gula
Ena ‘eşir zaf hiraya

Bi, gueşdari bıkır bıra
Bueg’ıd bıgêr, mek xu vira
Vêr Quba ra bun her ca ra
İtyaz mıntıqê Yexkig’ya

Ez kumca vac, kumca nıvac
Destmac bıgêr, bıkir nımaz
Tur ‘Helirgem’o Zıar’iz vac
Yexkig sanki yo dunyaya

En Feqir tim dewund gêren
Pê zazaki ho qaqıbnen
Unyen, dêwy ma bi vêng, qa’ryen
En co hira pıor Yexkig’ya

12-ZIKTÊ

Zıktê ‘eşira verina
Numê vist-hirıs dewuna
Ez ha min kitab ra vuna
Ena mıntıqê Zıktê’ya

Eg tı şıêr dewê Muradun
İtya sanki yo guılistun
Xu vir mek Mazrê Suelaxun
Aşkasuer dewê Zıktê’ya

Şunbegun cê ağun, mirun
Tim şum verdên ityad begun
İtya ra tim vıeren rayun
Şemsun’iz dewê Zıktê’ya

Bi, Gırnues’ıd bu yo awêk
Cunsuer’ıd bıb mısafırêk
Pirık Sêyf’iz xu vira mek
Sêfun’iz dewê Zıktê’ya

Lıê Çotla bin kuê ra yena
Vêcyena; dest çot ra şına
Zaf lezzet est yêd, ez zuna
Sağun’iz dewê Zıktê’ya

Dewê Valyer ha sêr lêwid
Muedun, Arkyel hê pêr cıêrid
Hacyun zıktê ho per raştıd
Parçunç yo dewê Zıktê’ya

Tarbaçur’iz dewa pila,
Derê ‘Hemu sanki vıla
Binziyar munena çıla
Vaxkin mıntıqê Zıktê’ya

Riz’o Şıernu dêw Zıktê’yê
Xuıt o Bazun mar cirunyê
Şinic, ‘esıl yın mallêyê
Pısrağ’iz dewê zıktêya

En dêwiciz Vazenicyê
Hot kiyê’wo Yundas kiyê
Gic yo dadi, yo babiyê
Vazenun dewê Zıktê’ya

En vatê miz gueşdari bık;
En devıcuz xur umbazık
Xırawa, Talware, Kurık
Dık’iz yo dewê zıktêya

Feqir gêra pıorê zıktê
Min kitab ra nuşt en nuştê
Hem gêra hem nuşt en vatê
Zıktê, ‘eşira verina